侬好伐？

弗晓得哪能，今朝老想侬，阿拉两介头有几年唔么看见啦？自从侬跟伊跑到新西兰去后，我有8-9年唔么碰着侬了，侬回去，我弗回去，我回去，侬又留在新西兰。顶顶痛苦的辰光，我的外婆（侬的阿娘）去世，伊老人家顶顶欢喜的两个孙囡，一个也唔么送着终。后头几年，侬还记得伐？伊的魂灵头寻到新西兰，弄得侬整天哭哭啼啼的，人家讲，要做做法事就好了，屋里厢弗相信，结果侬一直弗好，后头唔么办法，就让小J去做做，过点辰光，侬真的好了；侬好了，轮着我，大概一年辰光，我每天夜到做梦，夜夜做着外婆，也是莫名其妙就哭，嘴里一直讲：“恨勿得明朝就买张飞机票回去。”也是一直弗好。后头我回去辰光，到外婆坟郎厢去烧烧，再回来，嘿，就自己好了，侬相信也要相信，弗相信也要相信。

阿记得小辰光？侬打扮得像个小妖怪，人么聪明得要死，闲话讲弗清爽，乃“姑父”叫“功夫”。阿拉一直要笑侬，阿是要吃“功夫茶”啊？侬想要吃糖，又开弗开瓶盖头，乃了一把小榔头，玻璃敲敲碎，就吃了，大人全看牢侬，呆煞了，哪能介皮的小姑娘啊？

有一天，侬想要看鸡是哪能生蛋的，我领侬到河滩头一家人家，外头有只老母鸡正好勒该生蛋，侬急煞了，一定要我将蛋乃出来，我哪能办？唔么办法，只好用手乃半只鸡蛋一道帮忙拉出来，然后两介头捧了只鸡蛋拼命跑，做坏事体了，怕人家追出来。最后一趟碰着侬，阿拉两介头还讲起这桩事体。

后头阿拉两介头，全变成了欢喜孵在屋里厢的文静乖乖囡，侬比我还要文静，一日弗讲一句闲话都可以。两介头全欢喜着，会得打扮，记得阿拉两介头，一道走勒淮海路上，回头率勿要忒高噢。咯种辰光老早一去弗复返了。

侬现在跟伊，发展得蛮好。阿拉两介头的婚姻，也是一开始大人弗看好的，结果现在大人全放心了。阿拉同样的命运，全走得介远，全在南半球，这趟回去，阿拉好碰头了。

讲不光的闲话，碰头再谈。

咯篇写给我唯一的表妹，芸。

 31/10/2010于BS.AS.