我出生于1950年，啥辰光开始用粮票格是勿记得了，因为自然三年灾害前还是个小赤佬呀，而且伊个辰光粮食还是蛮够格，上海我记得好像辣辣1960年上半年到饭店吃饭还勿要粮票，伊年仔爷老头子调到武汉格471厂，伊一到武汉就发觉事体勿好，写信回来叫阿拉娘要当心，粮票能省就省点以防万一，那末老娘就隔仔一个礼拜就带阿拉兄弟姊妹到日晖饮食店（离屋里近勿需要乘车子出去嘛）吃中饭，所以记得还勿要粮票，后时来越来越结棍，其他供应物事少了，肚皮好像就越来越大（还好我勿是小姑娘），油水勿足就越吃越多，我刚刚过十岁，格末搭仔一般市民一样定量，廿五斤一格号头，侬倒想想看，假设有鱼有肉，一天八两应该够了，不过肚皮里空捞捞，加上迭个蔬菜还勿使随便买，用句宁波闲话叫做“真正作孽”啦。

整个三年里厢，好像一日到夜就是想吃物事，饿死鬼一样格，相信过来人有搭一样的记忆。

迭种情况影响了阿拉爷格工作，伊家471厂本来准备大办特办一记，六机部弄了个中将（犯错误）去当厂长，武汉调个市委工业书记去当党委书记（少将），牌子乓乓响，自然一记头灾害起来，国家只好让迭家厂下马，爷老头子“奥少”（迭两个字哪能写？ 阿里位阿哥阿姐帮帮忙）借此机会回上海养病，谢谢迭家厂个领导，谢谢伊拉一家们，阿拉爷辣屋里休了一年半病假，没有扣钞票，不过还有可能使伊格辰光伊拉单位格人连弄迭种事体的人饿得劲道好没有了。

不过爷老头子人是回来了，但是定量还辣武汉，伊讲伊格辰光武汉格干部定量比上海少好几斤，上海应该是27斤伐，伊只有23斤，后来爷老头子调回上海到了409厂，迭格辰光情况还开始好转了，粮票还就勿是伽稀奇了。

现在拿迭种事体讲给小青年听，有些人讲我辣辣乱话三气，勿是我造谣，此地真格有人讲伊格各种票证格日子是“阳光灿烂”的辰光，迭个我就真格弄勿懂了。